بسمالله الرحمن الرحيم

TEWHYD

 (1)توحيد باريتعالي جل شانه

خالق عالم پاك انت چه مت و درورا

ائ حبر حق انت گوش كنت صدق و باورا

ذره ذره مان عالما كل كائنات

ياد كنت هر يكئ په يكتائي داورا

هر كس زانت كه خود بخود هچ چيز نبيت

نقش بئ نقاشا كيا ديتگ ظاهرا

تو كدي منكر سوهوين استادئ مبي

چم وت گندئ مشتگ و زاگين خنجرا

قاليا گندئ گون عجب نقشين صورتا

بيگمان تصوير نبيت بئ صورتگرا

پدگر چه گامگيج و پدا مردا درست كنت

هم پدا چاريت و در گيجيت اشترا

خشتئ بغير از قالبا وت جور نبيت

دست معمار انت چست كنت برزين گواتگرا

گل گورا گيجيت قيمتي سهت و زيوران

علما نقاشي كتگ كلك زرگرا

كشتيا گندئ گون زرئ موجان ليب كنت

دست ملاحا جلتگ جهلانكين زرا

ماشين كه كوه و درهان جست و خيز كنت

ترمز و فرمان گپتگ انت ددين شوفرا

بوان كتابا و كاتبا شاباشئ بكن

منشيا منوگر ببئ وانئ دفترا

سيل بكن دهرئ نقشها با چشم خرد

خالقئ توحيدئ نشان اير انت هر گورا

هنچو دولابا دور جنت قصر كهكشان

روچ و شپ در كنت المدام گشت و چكرا

شمس خاور كه هر صباح ملكان سيل كنت

نور و گرمي دنت عالمئ سارتين سنگرا

سرزمينا كه رحمت باران سبز كنت

بيا بچار آئي سفره و پلين پترا

ور ورين نيبگ گون هزار طعمين رنگ و بو

تئي دلئ حب و واهگا وارينيت ترا

آپ همئ يك انت بزگين خاكي نوش كنت

رنگ و بو يك نه انت هر گلئ گنجين كهچرا

نو نهالان كه فصل پائيزي لخت كنت

وقت گوازيننت برهنگا مثل بزگرا

خاليگين دستان برنت برزا گون كريم

پندگ لوتنت خالقئ صد گنجين درا

كيت په دستور مالكا صد گنجين بهار

گل پدا پوشنت پاريگين پشك و چادرا

ابر نيسان كه هر گورا بانجي بهر كنت

سر پچين صحرا و تياب , لنجين بندرا

ترمپئ كه چكيت در صدف گوهر جور بيت

دست دانا انت در صدف سازيت گوهرا

قطره آپئ كه جهيت از پشت پدر

بر قرار آرام گريت بطن مادرا

خون بيت رندا گوشت بيت , سائي مان بيت

گد چار ماها حكمت رب اكبرا

طفل نادان كه كيت چرا نه ماهئ سفر

صورت و پيكر سازتگ پيشا قادرا

دست و پا انگشت و زبان چشم و گوش و دل

بئ دپ و سوالا داتگ انت بنده پرورا

گريوگا لگيت ماتي پستانا دنت دپا

صانعا سوج داتگ مچگ شيرئ پيسرا

هچي گون نيست انت كيت چرا ديرين منزلان

پاشپادا كيت سردر و لخت و جاندرا

ربي رودينيت رزقي دنت عقل و هوشي دنت

شاهي كنت ملكئ ايري كنت تاجا بر شرا

گدگارودينيت خدا نخلئ جوان بيت

گون برو كنت و كنتگ و لت و كوكرا

آدمي يك انت شكل وآوازي يك نه انت

مچ همئ يك انت گون هزار قسمين سر برا

بيا روانبد كه قدرتئ كارپد ظاهرانت

چم و دل كورانت عقل و مت نيست انت منكرا

وت سرا چون چون جور بنت ائ نقش و نگار

قدرتئ دست انت كار كنت چير و اندرا

كل همئ صنعئ دسكار انت وتي

نيست ادا كار و اختيار دست ديگرا

چون دو دل يكجا پيم بيت يكين سينها

سا دو انت چون چون تهنت يكين پيكرا

ملكئ سردارا هر كجا گندئ يك كسئ

دود نه انت دنيائئ دو شه يكين كشورا

راجئ مستر كه دو ببنت ملكا شور بيت

شريتا جائز نه انت دو شو يكين همسرا

دو ببنت شه آ ملك بيت بئ نظم و خراب

زال بيت حيران گون دو زوراكين شوهرا

خالق و مالك دو ببيتين انت عالمئ

چو په گوم رپتار نكت دهرئ جنترا

وشرئين گردونئ رواج ايدابا نه بيت

پر كهيب جلوان ندات شمس خاورا

نظم ترتيبئ محكمين رشتگ سستگ ات

پرشتگ ات قانون بقا بئ چون و چرا

كپتگ ات رعد چه گرگ و برق از كندگا

گون هزار چما  نگريت سياهين جمبرا

كاهي تاكئ مان كوچگ و كهساران نرست

چمكئ مئ واسطا نجت لعلين دحترا

ماها په بچكندگ شپئ چادر سر نجت

چير دات پيشاني وتي بدر انورا

لنج دريائئ بنزهين چمگ خشك بيت

گپ گون آ استينان نجت برزين تيهرا

يكدم چه كارا كپتگ ات ميزان حساب

بند بيت گردش ماه و سالاني يكبرا

روچا مان راهاني سرا كافور نريتك

سيه شپا انكاس نجت مسكين ماپرا

ملگين كوش مان كيلگان سيليگ نياتك

كوردپان پرگول ندات قهرين صرصرا

بلبلا الحان و گلا گلنازي نكت

قمريا گلبانگ نجت سولاني سرا

سنبلا سياه و دكمين ملگور نرست

نرگسا شپ پاسي نجت باغئ خاطرا

ملكئ كواسان وشدلين ديوان نكت

پر ردان درگالي نكت كانين شاعرا

خاكا گون آپ و آتشا پيوند نبيت

ختم بيت دنيا و نمنت چيزئ آخرا

ائ جهان نيستئ پردگئ پشتا رپتگ ات

بلكين چه نيستا نبيت پيدا بندرا

نظم و ترتيب ائ جهانئ راستين شاهدئ

خالق عالم پاك انت چه مت و درورا

نقشئ كه عبدالله جنت پشت كاغذا

وت گواه انت كه درچتگ نوك پاركرا

ــــــــــــــــــــــــــــ

گرّ كنت وهدی دل كه نادانين

مهنتان زندے گيش كنت گرانين

دريگتين بيتكينَنت پَدا پيشي

وژدلين باريگ وشّ و شادانين

پاس كنت هنچو دل شپي پاسان

تو گوشے زانان تِبلی هَيوانين

بيا كه بندپگان تيي زهيراني

آتكگنت موسم سارت و ساچانين

ترانگان وشّين هلوتاني دنت

شنزگان نرمين هور شبستانين

چير جَتنت تو چه كنڈي نوكاپان

كدّهان نوشان پُرّ و نيمانين

سر مچار سر گوْستنت سران ايشي

دپتری نكش اِش كت نمير انين

جاهی كه انسان اِنت نه انت پْريشتگ

چو وَ مردم هم باز انت شيتانين

چه كجا رهشونی بيارن كه

سر بكنت ما را آپسری جوانين

جاهي مان جنت بات بهشتیے !

مومنين مردی اَت مسلمانين

من وتا دَور دات انگر و آسان

كه په تودر بيَيت راهی آسانين

گهتر انت مرگ چه مُرتگين زندی

مَرگ نميرانين ، زندی بيرانين

هاترا تييگا سر گوْزان سيتّان

تاوان تیي سيتّ اَنت پمّن تاوانين

چو كه هاریا دير سرين پُرشتگ

دَور نه بيت دارگ دْرك و ميدانين

كوليگ په كْراماني كپيپلّا

شنك پرا شهكّدا كما مْيانين

اَتك چو كَوشیا  كشّان كشّانا

شُت چو نوديا شنزان شنزانين

بُرت دلے سبر و تاكت و تاهير

بمبهين دو ستيا دل و جانين

مرچي ديوانا مردمی گرْانين

كنڈ  زنوكيّن و پُل بروانين

وس كنان گو ياكين زبان للّ اِنت

گرْنچتگ گپّی زردا ارمانين

داتگين دردان بی دوائينان

ما كدي لوٹِت درد‍ی درمانين

تو  بهاراني ٹيٹلين آسك ئے

ما گنوكاني مُلكی   وَ يرانين

يكّی چمّ اِنت و يكّی چمّے روك

مٹ نه انت درستين مردم مهمانين

چو وَ همرنگ اَنت هوشگ  گنديمے

داني داني انت بی دان بی دانين

جت گِروكيا دوشي گوريچّان

جز مان كه كيت انت هاری توپّانين

روچی سد رندا گم تيي كاينت

پَمّنا نر شيري نُدْريشانين

گوش بدار گالان بی بهائينان

همبلين بيل و همدل همزانين

چه زرا كشّان درّ و مروارد

چو كه كوّاسين مهتران كانين

آلمی بهمنتگ سيد مرچي

چه تئي سسّايا سچكان سچكانين

تُهم تاوان انت سورگ و سِنگان

سند و هوشاپان هشك و  بی كانين

چَرت و  آدْرو  كُت ڈگار،  عابد

دُرگلُے اندوهان دو دنتانين

عابد آسكاني

ــــــــــــــــــــــــ

GOLKHAN NESYR

tewey

Meny dil meny new jewany tewey

Meny zynet o zindegany tewey

Gemany syahiyn denz o mojan

Men shad'on, meny shadimany tewey

Meny gal o goptar morwarid int

Iy dorriyn zobaney rewany tewey

Syahiyn shepany teha gem dehiyn

Meny mahtabiyn nishany tewey

Che ishkey melengy o biy sarya

Moryd'on meny jan o Hany tewey

Che kolliyn jihana weten sarya

O gođđ ech weten , duwst o jany tewey

Che derd o geman, men ki biy sodd e bon

Meny nuwsh daru gemany tewey

Meny dil nelerzyt her moshkila

Meny himmet o pehlewany tewey

Nesyr'on pe sheyr o zoban danya

Meny ab o jewher zobany tewey

 Teyy nama

Sohby mehleiyn gwerbama

Nuwd pe gwaregy perrama

Shenzent gwaregan dorriynan

Neylent wepseg o arama

Taran guwn jenent yadany

Duwstany deyent peygama

Peygam dilberiyn mehtuwsey

Nuwdan che richent gwerbama

Trynzan bent giruwk pikrany

Zindan ruwk e byt ilhama

Pikrany jihan wadan byt

Wesh ruiyn kejey ikrama

Lehđiyn dil gel o balany

Tuty pelpeŧyt me dama

Bendy bezzegiyn charan int

Ruwkiyn atishey enjama

Mewjany Nesyr niyk paly

Sohby yad e kent teyy nama

-----------------------------------------------

tew weta kesta der ken yek beriy

menziliy guwn ma seper ken yek beriy

pehk o pelgariyn iy dehrey parsa

gendegiynan bya o sher ken yek beriy

renda nind o wahegey geppa bijen

damona ersan guwn terr ken yek beriy

tewbeh karana wety red wartegiyn

guwn pechiyn ruwa heber ken yek beriy

rehgwezygana wepaey rehserey

apseriy huwnekkiyn ser ken yek beriy

duwsty guwn ebed maniyn kishar

sebz o golgerkey, semer ken yek beriy

daima zeng o zar o renjiyn sahira

bayed int dilguwsha gwer ken yek beriy

morad sahir

ننگ په رنگ نبيت

مهر گون جنگ نبيت

كار دنيايَي كدي

په كسا تنگ نبيت

حُسن وَ باز انت همك

كيگد و انگ نه بيت

منزلا رژنَي رسگ

ايمن و بنگ نه بيت

هچ شرف دار نه بَي

دان ترا سنگ نه بيت

سر بيان چون بهشت

زلف تَي چنگ نه بيت

شنز مهراني دروگ

جنبرين پنگ نه بيت

ساهگا نندان گَمي

دانكه دل تنگ نه بيت

آزگي درد نه وارت

درد دان گْوَنگ نه بيت

( اصغر علي آزگ )